Ịdọ Ndị Na-etinye Ego Aka Ná Ntị — Nkwupụta Ịgọnarị Banyere $Davido Ego kriptọ njakịrị ịntanetị E bipụtara: Juun 14, 2024

A dọtala uche Securities and Exchange Commission, Nigeria (“SEC”) gaa na ego kriptọ njakịrị ịntanetị a maara dịka “$Davido” nke a na-ekwu, ma ekwenyebeghị, na ọ metụtara onye Naịjirịa a ma ama na-agụ egwu, David Adedeji Adeleke nke a makwaara dịka Davido.

N’ozuzu, ego kriptọ njakịrị ịntanetị bụ ego kriptọ e ji ihe onyonyo ntụrụndụ na njakịrị ịntanetị kpalite. A na-echekarị ha dịka ego kriptọ ntụrụndụ na-enweghị nnukwu ihe dị n’obi, nke a na-akwalite site n’òtù ndị mgbasa ozi mmekọrịta na mgbe ụfọdụ site na nkwado ndị a ma ama. E BUGHỊKWA ego kriptọ njakịrị ịntanetị n’obi ka ha bụrụ ụzọ mgbanwe ihe nke ọha na eze na-anabata maka ịkwụ ụgwọ ngwaahịa na ọrụ, ma ọ bụ nnọchiteanya dijitalụ nke ngwaahịa ahịa isi ego dịka mbak, akwụkwọ ụgwọ, nkeji nke atụmatụ itinye ego ọnụ, nkwekọrịta ngwa ego ọnụ ahịa ha sitere n’akụ ndị ọzọ, ngwaahịa ma ọ bụ ụdị ngwa ego ma ọ bụ itinye ego ndị ọzọ.

A na-ADỤ ỌHA NA EZE ỌDỤ UGBU A na ego kriptọ njakịrị ịntanetị enweghị uru ndabere, ha dabere naanị n’ịtụ anya na ọnụ ahịa ga-arị elu. A na-ADỌ ỌHA NA EZE AKA NÁ NTỊ na itinye ego na ego kriptọ njakịrị ịntanetị, gụnyere $Davido, nwere nnukwu ihe ize ndụ, a ga-eme ya naanị mgbe a ghọtara ihe ize ndụ ndị metụtara ya nke ọma.

A na-adọ ndị ọrụ ahịa isi ego aka ná ntị site n'ọkwa a ka ha ghara iso ngwa ego ndị na-anọghị n'okpuru nchịkwa SEC nwee mmekọrịta. A gaghị ekesa ma ọ bụ nyochaa ụdị ngwa ndị ahụ site n'usoro ahịa isi ego ọ bụla.

BỊKO MARA na Kọmishọn ahụ anaghị amata $Davido dịka ngwaahịa itinye ego ma ọ bụ ụdị akụ a pụrụ itinye ego na ya n'okpuru nchịkwa ya; ya mere, ndị sonyere na ya na-eme ya n'ihe ize ndụ nke onwe ha.

Kọmishọn ahụ ga-aga n'ihu na-enyocha mgbanwe na usoro ahụ, ọ gaghịkwa ala azụ iji ikike nchịkwa ya mee ihe mgbe ọ dị mkpa.

A BINYERE AKA

NDỊ NCHỊKWA